பெரும்பாணாற்றுப்படை 7

சாத்து செல்லும் வழிகளைக் காத்தல்
பாடல் வரிகள்:
எல்லிடைக் கழியுநர்க்கு ஏமம் ஆக
மலையவும் கடலவும் மாண்பயம் தரூஉம்
அரும்பொருள் அருத்தும் திருந்து தொடை நோன் தாள்
அடிபுதை அரணம் எய்தி படம்புக்கு
பொரு கணை தொலைச்சிய புண்தீர் மார்பின்
விரவு வரிக் கச்சின் வெண்கை ஒள் வாள்
வரை ஊர் பாம்பின் பூண்டு புடை தூங்க
சுரிகை நுழைந்த சுற்று வீங்கு செறிவுஉடை
கரு வில் ஓச்சிய கண் அகன் எறுழ்த்தோள்
கடம்பு அமர் நெடுவேள் அன்ன மீளி
உடம்பிடித் தடக்கை ஓடா வம்பலர்
தடவு நிலைப் பலவின் முழு முதற் கொண்ட
சிறு சுளைப் பெரும்பழம் கடுப்ப மிரியல்
புணர்ப்பொறை தாங்கிய வடு ஆழ் நோன் புறத்து
அணர்ச்செவிக் கழுதைச் சாத்தொடு வழங்கும்
உல்குடைப் பெருவழிக் கவலை காக்கும்
வில்லுடை வைப்பின் வியன் காட்டு இயவின்..........(66-82)

விளக்கம்:

[...பகற்பொழுதில் போவோர்க்கு இளைப்புத் தீர, மலையிலுள்ளதும், கடலிலுள்ளதும் ஆகிய சிறந்த பயனைக் கொடுத்து அறிய பொருளைப் பெற்று உலகத்தார் அனுபவிக்க விரும்பம் கொள்ளும்,திருந்திய தொடையின் வலிமையான காலில் பாதங்களை மறைக்கும் காலணி அணிந்து, சட்டையிட்டு, ஆறலைப்போர் எய்த அம்புகளால் உண்டான புண்கள் இல்லாத மார்பினர். மலையில் ஊரும் பாம்பைப் போன்று பூணப்பட்டு ஒரு பக்கத்தில் தொங்கும் உடைவாள் செருகப்பட்ட சற்று வீங்கிய இறுகக் கட்டப்பட்ட உடையையும், வில் அகற்றிய இடம் அகன்ற வலியையுடைய தோளினர்.கடம்ப மரத்தில் வீற்றிருக்கும் நெடிய வேலுடைய முருகனைப் போன்ற பெரிய கைகளை உடைய தோற்று ஓடாத வழிப்போக்கர் அதாவது சாத்துவர்கள்.வளைந்த கிளைகொண்ட பலா மரத்தின் குலை தள்ளிய பருத்த அடிமரம் கொண்ட சிறிய சுளைகள் அடங்கிய பெரிய பழம் போன்ற மிளகினை ஒத்த கனமாகச் சேர்ந்த சுமையைத் தாங்கிய வடு அழுத்திய வலியையுடைய முதுகினையும்,நிமிர்ந்த காதுகளையும் உடைய கழுதை கொண்டு செல்கின்ற, சாத்துக்கள் போகும் சுங்கம் கொள்ளுதலையுடைய பெரிய வழிகளில், வழியைப் பாதுகாக்கின்ற விற்படை காவல் பொருந்திய ஊர்களையுடையதான தன்மையுடைய அகன்ற காட்டு வழியில்..]

இந்தப் பாடல் வரிகள் மூலம் நாம் அறிந்து கொள்ளும் செய்தி:

செல்லும் வழிகளில் ஆறலைப்பவர்களின் தாக்குதல்களிலிருந்து வணிகப்பொருளைப் பாதுகாக்க வணிகக் கூட்டத்தார் ஒரு போர் வீரனுக்குறிய வீரத்துடன் செயல்பட்டனர்.'வம்பலர்' என்பதற்கு வழிப்போக்கர் அல்லது வணிகக் கூட்டத்தார்(சாத்துக்கள்) என்ற கூடுதல் அர்த்தமும் பெறப்படுகிறது.அதேபோன்று, "தடவு" என்ற சொல்லுக்கு 'வளைந்து ஒடுங்கிய பகுதி' என்ற தெளிவாக்கமும் பெறப்படுகிறது.சாத்துக்கள் செல்லும் பெரு வழிகளில் விற்படை ஏந்திய காவல் பொருந்திய ஊர்கள் இருப்பதும், சுங்கம் கொள்ளும் சுங்கச்சாலை இருப்பதும் தெரிய வருகிறது.